بنات على الطريق

[khaled...]

بنات على الطريق

هدؤ رهيب .. صمت مرعب

قطرات ندى .. شوارع خاليه .. سكون موحش

شتاء ثقيل .. البرد السقيم حل .. والهم والتعب ازداد

ماهو حال هولاء الفتيات..؟؟

الى متى ستصمد قوتهن؟

هل ستتحطم احلاهن .. ام ان طمحاتهن اكبر..؟

=-=-=-=-=-=-=

ام مها:- .. يالله ياكريم ..مهااوي يالله يابنتي قوومي وراتس دوام

مها ( والمرض قد تمكن منها ) :- ياربي تعبانه يمه ماابي اداوم اليوم بغيب

ام مها :- ازين لتس نوومي ارتاحي يابنيتي ( الام من خوفها على تعب ابنتها فضلت صحتها على دراستها )

=-=-=-=-=-=-=


ندى ( تمارس هوايتها المعتاده على النت متصفحه الماسنجر)

ندى:- يالله سنسن انا طالعه وراي دوام

سنسن :- الله يعينك ياوخيتي انتهبي على نفسك

ندى:- قوولي يارب نتخرج ونفتك من هالكليه القرف

سنسن :- انشالله يارررررررررررررررب.. ويالله روحي فمان الله

ندى:- فماان الله

( تغلق مانسجرها وتستدعى لمشوار الالف ميل )

=-=-=-=-=-=-=-=-

خلود عكس كل البناات حبابه ونشيطه تقوم بدري ..و هي الي تجهز القهوه وتاخذها

لصديقاتها .. يتسلون يقصرون الخط ..

=-=-=-=-=-=-=-=-=

سووومه هالبنت المتفائله توها اول سنه ومتحمسه
( يارب تبقى كذا على طول ولاتعب المشوار يحطمها )

=-=-=-=-=-=-=-=-

شوق :- يوووسف تكفى قم يالله الباص بيروح عني

يوسف :- الله يغثك تعبت كل يوم اوديك مع انصاف الليوله اتركي الكليه وفكينا

شوق:- تف من فمك ..خلاص هااانت اخر سنه تكفى قم عاااد

( شوق كانت مشكلتها الوحيده انه اهلها يحبطون من عزيمتها والإ هي اكثر وحده متحمله )


--------- ---------

هن بناااااااااات .. من تلك القريه الي ماشافت عيوني احلى واطهر منها

كلهن طموح وامل بمستقبل جميل واعد .. وغرضهن نبيل وهادف

تحسين وضع عائلتهم

وماكان على لسانهم الإ

مشوار الالف ميل ,, يبدا بخطوهـ

الساعه 4 فجر .. تعتبر لديهن وقت الاستعداد

للذهااب للكليه التي تبعد عن قريتهم 190 كيلو
بينما لدى الباقين يكون وقت النوم ...


الليكم هالقصه الي ستبقى ذكرى ساحفظها بقلبي قبل عقلي .. هي مضحكه ومحزنه


بعد يوم طوويل ومتعب وصلنا الى محطه وكنا نبي مسجد

( هههه شوق تبي دورة ميااه وانتم بكرامه)

وفي بنااات كانوا يبون غداا المهم تفرقنا نص مننا راح المسجد ونص للبوفيه *_^

وتقريبا كان الوقت 40-2 ظهرانا وشوق وتوتا وشيررري وهنووو نزلنا المسجد ومافي ايدينا غير مناااااااااديل

تركنا جوالاتنا وشنطنا بالباص >>> قمت الدلاخه

والباقين نص راحو للبوفيه ونص منهن جلسو بالباص

صليناا .. وعينا من الله خيرر .. وتسدحناا .. وريحنااا

والساعه تمشي 15-3

اذن العصر .. قلنا اكيد تاخرو يحترون المحلات تفتح بعد الصلاه

جت الساعه 40-3

جت 4

و15

ونص

5

ونص

خلااااااااااااااااااااااا ااااااص اذن المغرب

حنا عاااااااااد مافينا اعصاااااب .. المنطقه على خط زراعيه موب على خط سريع

والمحطه كلها بنقاله وهنود

والمسجد مافي حريم ابد.. ندعي نتمنى ونحتري اي حرمه تجي على الاقل ناخذ جوالها .. ابد ماااافي كان الدنيا


فضت ومابقا فيها غيرنا صمــــــــــــــــــــــت رهيب رعب .. خفنااا

عاد قلنا مابدها خلاص لازم نطلع من المسجد ونروح للمحطه ندور تلفون ولانخااف حنا خمس

عااد انا كنت القايد >> اكبرهم

وطلعنا ويمه وربي شي يروووووووووووووووع >>> تبكي تذكرت

وكان في سوداني الله يجزاه خير ( فعلا لسا في ناس طيبه وتخاف ربها)

يوم شافنا ارتااااااع المسكين.. و انا الي شادين الظهر فيني بس بديت احكي الا انفكيت انواع الصيااح

والبنات من بعدي هو خاااااااااف جاب لنا مويه وحنا خفنا ماشربنا

بعدها سكت وقويت قلبي وطلبته تلفون حطمني قال انه تلفونه يستقبل

عااد انا خلااااااص ابصمت بالعشره انه هذا يومنا .. وانه حنا بجد بنااااااااات مناحيس

اخير اقترحت توتا اننا ندق على امن الطرق

وفعلا دقينااا .. وهالسوداني مسكين واقف معنا جاب لنا زوليه وفرشنا في المحطه

وجا امن الطرق ونزلو اثنين واحد ياهو مملوح ههه الله يخليه لهله *_^ عاد نفس المنوال بنسولف انفكينا صيااااااااح

وياربيه سكتونا وهدو علينا وقالو مابيخلونا

واخذ ارقام اهلينا ودق عليهم

وخلنا نكلمهم وجلسو معنا الى ان جاء ابو شيزو واخذنا

ويعتبر هاليووووووووووووووم اقوى يوم بحياااااااااااااااااتي

ماتتخيلون الذل والخوف والرهبه الي كنا فيها

بعدها اخذنا يومين مانداوم من قوة الصدمه

طبعا الغبيااااات الباقياااات محد فقدنا منهن لاننا حنا شله محاايده وفي حالنا

لما وصلو هناك استوعبوا انه نسونا بالمسجد

ماتتخليون لما وصلت البيت جدتي وش كااااااااان وضعها مسكينه وربي جالسه على دكه الشارع

تقول انها خايفة اني ما ارجع وتنتظر خبري وحاولت فيني اني اترك الكليه او احول بس انا قلت معصي

اخر سنه واحوول غباااااااااااااااااء

الله لايعيشكم مثل هاذاك اليوم قولوا آمــــــــــين ..

كلناكنا نحس بشي واحد متجمعين عليه يمكن ماصرحنا لبعض بهشي

بس كلنا نشعر به .. انه احتمااال كبير وحنا طالعين من بيوتنا مانرجع وتكون نهايتنا على هالطريق

والحين انا تخرجت بس البنات باقين يكافحون .. الله يوفقهم

وبعد سنه من تخرجــي الليكم آخــر المستجداات ..:-

على لسان ندى .. كالعاده طالعين من الكليه متجهين الى قريتهم وبعد ان سلكو الطريق الزراعي وانتهى الطريق السريع .. تنتهي معه شبكه الجوال ( لانها منطقه شبه جبليه )
البنات كانوا يسولفون ويضحكون الا شوي ..
هند :- بناااااات ماتحسون انه في شي غريب
ندى :- أي الباص يمشي بشويش الله ياخذه بنوصل متاخرين
هند :- ياربيه الله يستر ..
شوي والباص يوقف ونزل الحيوان السواق وسكر الباب على البنااات يبي يشيك وشفيه الباص .. المهم البنات انكتموا ونادته وحده عشان يفتح الباب يبون يتنفسون .. سالوه وشفيه البااص .. قال انه خرب وماراح يشتغل  وان اشتغل الحراره بتاثر وماراح يوصلهم
يعني مالنا الا ننتظر أي احد يمر يساعدنا (( تحيه لشركة الاتصلاااااات لحسن الشبكه))
وجلسوا تقريبا ساعه الا ربع العصر بدا يروح والمغرب على وشك والدنيا بتليلل والبنات
بدات نفسيتهم تتحطم (( كان الكون كله مافي غيرهم)) بعد فتره مر ونيت فيه ولدين
تقريبا في عمر25/27 استعجبوا من منظر هالبنات الى جالسين على جانب الخط
وقفو سالوا البنقاالي وبعدين واحد فيهم جاء وسال البنات .. ندى تبرعت وسولفت معه
الشبااب :- انتم من وين ؟
ندى :- احنا من ........... >>> مشفر 
الشبااب :- طيب شوفوا انا بخلي خويي هنا وعطوني ارقام اهليكم
برجع الى الخط السريع >>> 70 كيلو .. وادق لا تخافون تراكم مجموعه
ندى :- انوااااااااع الصياااااااح
الشاااب :- وشفيك قسم بالله باذنه بترجعون لهلكم .. لا تخافين سلطان عندكم
( ندووش قزت اسمه )

رااح الشااب ( عبدالرحمن) .. وبعد مده رجع .. وبعدها بفتره جاء اخوا ندى وابو
خلود وتقاسمو البنات السيارااات رغم انهم كانوا مضغوطين مررررررررررررررره
شكرا احمد عبدالرحمن وسلطان على موقفهم النبيل الشهم الي يعطيك امل انه لسى الدنيابخيررر ..

بتقولون ليش مايدخلن سكن الطالبااااااااااات؟

بقولكم تعرفون الزباله وانتم بكرامه يمكن تكون ارفع وانظف..ولافوق كل ذا كل شي ممنوع بجامه جوالات وكل
كومة طالبات بغرفه خير وينا فيه بشقه على السطوح
وتعالو شوفوا انواع المشااكل والمسخرهـ

بتقولون طالبوا الوزاره توفر لكم كليه قريبه وتحل مشكلتكم ترا الوزاره كريمه مايقصرون

سلمولي على الوزاره وقولو لهم ماقصرتو على كليه المجتمع ( المخيسه ) *_^ اسفه

كليه قسمين حااسب وانجليزي وللاسف الى الحين موب عارفين هي دبلوم والا خبلووم

هالكليه اسمها كليه السكووت .. لا مكافاءة ولاشي المعهد الثانوي للبنات لهم مكافاء هذي لا ليشش؟

بعدين بنت خالي تخرجت منها حااسب ويوم راحت تكمل بكليه التربيه قضبوها الباب قالوا لا الشهاده موب معترف فيها

قالت لهم طيب على الاقل عادلولي المواد قاالو لااااااااااااا

وشيعني ذا كــــــــــــله

ياناااس ياعااالم .. الجرايد ملياااااانه حوادثه وقصص مفجعه لبنااااات ومعلمااات نهايتهم محزنه مبكيه

وذنبهم الوحيد انهن كاانو طموحااات .. يسعون ورا لقمة عيشهم

في نااس كثير تستهون بي المعلمااات المتشحطيطااات ( المتغربلات) ولايقولون بسخريه

وش الله لازمه يقعدن ببيوتهن ابرك لهن...

في بنااااااات هن الي يصرفون على اهليهن في بنااااات على هالمكافاءه او الراتب قايمين ببيوت

انا مااتكلم من فرااغ انا اشوف هالبنات حواليني كثااار

يمكن انتي تكونين وحده منهم .. او يمكن انت اختك او زوجتك او حتى بنت جيرانك وحده منهم

بسالكم الى متى يقضون نص حيااتهم على الطريق .. !؟

المصدر: منتديات لمني بشوق - من قسم: (✿) يُحْكَى أَن ..