من وين يا عيوني .. لا يفوتكم

[*_* كل الطـيـــبــة *_*...]

من وين يا عيوني .. لا يفوتكم

من وين يا عيوني ..


كان يـــا مـــــا كان .. في سالف العصر والاوان..
كانت عائلة تعيش في مدينة وتسكن في بيوت مع حليلها وضناها..
كان عمرة ست سنوات .. وكان الفقر طاعنهم طعن مع صدورهم .. مثل غيرهم ..
او يمكن ازفت .. فكانت ام حسين قاتلها الجوع .. وقاتلها جوع ضناها حسين .. فكانت تقول لـــه (( حسين .. ))..فيجاوبها بونين والفقر طاعنه (( آه ..))(( تبي سحيحه ياعيوني ؟ ))..( السحيحة هي التمرة )
فيلصق حسين لسانه بلهاته ويتمطق ويقول (( منـــح ))فتقول له (( من وين ياعيوني ))..حسين يحكيها لي يقول لي .. ((مادري ليش يابو هايس تسألني الله يرحمها ما دامها أننا ماعندنا شي .. وانا اذا سمعتها
تذكر السحيحة ينقط سعبولي.. من الجوع .. مع انه مامن سعابيل.. منشفها الجوع))..
انا حسبتها حكاية كانت فيما كان ..وانتهت في سالف العصر والأوان ..

واكتشفت اني مخطئ .. وانه فيه مثلها كائن .. من مثل هالقصة اللي ابي احكيها ..
يكون يا ما يكون .. في عصرنا المزيون .. رجال عنده مريته وعياله..
يعيشون.. ولا يعيشون.. مع الناس .. ولاهم مع الناس ..
الرجال يجمع عياله حوله ويبدأ يعشيهم بالسوالف حتى ينامون..
في هالمساء وبطونهم تقرقر من الفراغ ..احس بغضب شديد عليهم .. وكل ماسمع بطن احدهم تقرقر يزيد زعله
وغضبه .. ويحمر وجهه ..
حتى انه وده لو يصير حصني وهم يصيرون دجاج .. ويمسكهم ويعرمشهم..
ويفتك منهم.. وحتى يفش غله .. ويفك ضيقة صدره .. قال لهم (( تبون منقه ياعيوني ؟ )) فيلصقون السنتهم
بلهاتهم ويتمطقون ويقولون (( مناااااح)) ..
(( ومن وين ياعيوني ))ثم يتركهم يمصمصون المنقه..قليلا من الوقت .. ويقول لهم (( تبون رمان طايفي؟)).. فيتمطقون ويمصمصون
بريطماتهم ويقولون (( منااااح)) .. فيقول لهم (( من وين ياعيوني)) ويتركهم يفقشون رمانهم الوهمي ..
ويفنشونها قليلا من الوقت .. ويقول لهم (( تبون عنب ياعيوني ؟)) فيونون .. فيتركهم يتخيلون عناقيد العنب..
وياكلون حبه حبه .. ويقول (( تبون كيوي ياقليبي ؟)) ثم يواصل ..
(( تبون قها ؟)) ثم يقول ..(( من وين ياعيوني))
..(( تبون فراوله وتفاح وبرتقال وعنانـــــاص؟)) ..[لايمكن مشاهده الصور والروابط الا بعد التسجيل ]
((من وين ياعيوني )) فأذا شعر انهم شبعو ا من سوالف الفاكهه .. يواصل شغله في مطعمه المليان
بصنوف الكلمات الشهية اللذيذة .. فيقول لهم (( اقربو يالغالين )).. فيتزاحمون حوله..
لأنهم فوق العشرة .. ماشالله عليه .. يقول لهم (( تبون صحن تمر فيه سكري ..وبارحي .. وخلاص .. وخضيري
وصقعي ..ووووووو.. ومعه صحين قشطة ؟)).. فيتمطقون ويعضعضون بريطماتهم ويقولون ((أممممممممممم))فيقول (( من وين يابعد روحي )) .. ويتركهم .. واصابعهم تتزاحم على صحين القشطة .. ويواصل
(( تبون هالحين صحن .. تبسي فيه رز عنبر .. وفوقه لحمة حاشي .. والقرصان وقطع البيدجان ..
والكوسه .. وفصوص البصل .. والبيض .. والزبيب .. ومذرور عليه ليمون اسود ..؟))فيعضعضون صبيعاتهم .. وراحاتهم وهم يقولون (( أممممممممممممممممم)) فيقول (( من وين ياقرة عيني )) ويعلن توصياته لهم ..))

كل واحد يذكر اسم الله قبل ما يبدأ حتى يطرح الله البركه فيما تأكلون .. وكل واحد منكم يأكل مما يليه ..من ركنه ..
كل واحد ياكل رز قبل كل شي .. لاتبدون باللحم ياعيالي .. واذا خلصتوا تقولون الحمد لله والشكر
حتى مايزال الله هالنعمه .. ولا تنثرون ولا تنوقطون وانتم تشربون المرق سمعتوا ياعيالي ؟..))

(( .. فيقولون له وعيونهم طايره في وجهه كأنها الذبان ))
سمعنا يابابا )) .. فيقول وهو يمسح على بطينه ((.. بارك الله فيكم )) ثم يلتفت يمين شمال ويقول لهم
(( اللي خلص يأخذ صحين حلا .. فيه ام علي .. وكنافه .. ومحلبيه .. وجلي .. واذا خلصتو من الحلا
ترو فيه سلطة فواكه ..)) فيفركون ايديهم ويتلفتون ..

فيشوفون بريعص على الجدار .. قرب السقف .. فيطيرون الى الجدار ويتقافزون .. يتطاولون عليه
والبريعص يطالع فيهم من غير خوف كأنه يقول لهم ..
(( اقعدو عند ابوكم خلوه يوكلكم سوالف .. من زين هالوجبه حتى تقامزون ..
الشرهه علي ..أنا.. اللي جيت عندكم .. قلت اسليكم بالتصفــــير .. واصيد من ذبانكم .. مالت عليكم..
اعطاهم ذنبه ومشا

((.. كان ابوهم يصيح فيهم ..)) لا تقامزون ياعيالي وانتم شبعانين ..
مايجوز ياعيالي .. اقعدو .. يا بعد روحي .. حتى يتهضم طعامكم ))..يتزاحمون حوله .. واحد من العيال .. صار يترغ .. قال له ابوه (( كثرت ياوليدي من اللحم .. الله يهديك ..
انا قايل لكم مايجوز انك تاكل حتى تملأ بطنك .. ثلث المعده للطعام وثلثها للهواء .. وثلثها للماء
انتم شربتوا ماء ياعيالي ؟..)) قالو ((لا)) ..قال ..(( أشوى .. تبون لبن بــــارد واحلى من العسل ؟))..
((امممممممممممممممم)).. ((منح))..قال ..(( من وين يانور عيني )) ..تركهم يرسمون صورة اللبن .. ويمسحون براطمهم ..
قام من عندهم وراح للحمام .. وعند باب الحمام قام يكلم نفسه ..(( الله واكبر ياهالعصاير اللي طول اليوم وأنا اشربها
مالها سنع هالقمزة )).. ثم رجع الى مكانه من دون أن يدخل الحمام ..
جلس في مكانه وطالع في عياله ..كأنه يراهم لأول مرة .. صارت عيونه تخترق جلودهم الملفوفه
على عضيماتهم .. وصارت أذنه تلتصق ببطونهم .. ما عادت بطونهم تقرقر .. قال لهم ..(( هالحين اكلتو من هالنعمه
المباركة العضيمة حتى شبعتوا .. وشربتو لبن .. حتى ارتويتوا ..صح ؟))..قال كلمة .. صح .. وعيونه كانها تبي تقفز من محاجرها .. قالو بصوت واحد ((صح))..اكمل هو (( زين .. هالحين .. تبون تروحون للمسرح .. ياعيوني ؟))..قالو وهم يطالعون بعضهم (( آييييييييييييه.. ياليت)).. قال (( تبون مسرح كوميدي والا تراجيدي؟)).. قالو (( كلهن .. نبيهن كلهن))..
قال ((من وين ..ياعيوني)) تركهم قليلا من الوقت وهم يتشاورون .. وين يجلسون.. في المسرح
وهم يضحكون في المسرح الكوميدي حتى ترتفع ضحكاتهم .. وتأصل السماء ..
وهم يبكون في المسرح التراجيدي .. متأثرين بألاحداث .. يبكون وينشقون .. يبكون حتى تختلط دموعهم بما يخرج من انوفهم.. ثم اكمل (( ودكم تروحون الى الســـــينما ؟)).. قالو وهم يتقافزون عليه ويطوقونه
بايديهم ويبوسونه (( ايييييييييييييييه .. مشكور يا بابا..))..قالهم وهو يبعدهم عنه (( وخروا عني .. كتمتوا نفسي .. ابي اتنفس .. من وين يابعد روحي ))..
((ودكم )).. ((من وين ياعيوني))....فصل لهم ملابس رائعة .. واشترالهم سيارات ,, وبنى لهم بيوت .. فيها حدائق ..
حدائق جميله .. لكن .. من وين ياعيوني ..وبعد روحي ..
وقبل ان ينامو طلب من احدهم (( رح جب لي المصحف .. اقرأ عليكم ماتيسر من آياته الكريمه قبل ان تنامو..))
ولما مسك المصحف سألهم (( تبون اقرا عليكم سورة الرحمن ؟)) قالوا (( نبي تقرا علينا سورة يونس عليه السلام ..))
فضحك وقال (( ودكم بحوت يبلعكم ويزرطكم .. وتعيشون في بطنه الى ان يشاء الله ؟))..قالوا ((ايه .. ياليت ))..قال (( من وين يااغلى الناس )).. لكنه لما شافهم ينعسون ..
وبدءوا ينامون صار يقرا ويرتل سورة الشرح ..
((.. الم نشرح لك صدرك.........)).....

وانتهت القصة لكن انا لي ملاحضة في اخر جزء الي فيها عن سورة يونس
اخاف انه في استهزاء ..وشرايكم
القصة جايبها من جريدة عكاظ

كاتبها
د.فهيد الحماد

تحياتي
كل الطيبة

المصدر: منتديات لمني بشوق - من قسم: (✿) يُحْكَى أَن ..