انـا وٍسوٍيـرٍ وٍالجرٍسـوٍن << من خنبقت قلمـي

[نملهـ طفشانهـ...]

انـا وٍسوٍيـرٍ وٍالجرٍسـوٍن << من خنبقت قلمـي

هاي افري بدي


بصراحه انا وحده مابحبش اللف والدوران والمقدمات اللي مالها داع فبادخل بالموضوع دغري >>
ياشين اللي مالقت مقدمه وجت تلفقها
.
.
.

.

جاء الصيف وطبعا الملحطين مثلنا قاضبين الرياض منها يحرسونها وبالمره يسقون زرع بيوت الجيران

مغير جالسين في البيت كالعادة ..الواحد يقابل الكنديشن لا ينقرض من الحر


اييييه الله يذكر السفر بالخير اخر مره طلعت من الرياض يوم كنت باولى ابتدائي وكانت رحله خطيره الى يومي وانا اسولف بها على صقيقاتي
وكانت لديرتنا وهــ بس يازينها من ديره >> ما كأنتس شطحتي عن الموضوع


و في صبيحة يوم مشمس وجميل وأنا أغط بهدوء وطمئنيه في نوم هنئ واحلم بأحلام سعيدة للغاية وعند دخولي في أحلى شي بالحلم

سمعت صوت كأنه صوت دبابات وقنابل قمت ووجهي ملئ بالخوف والذعر بسم الله لايكون اليهود خلصوا من لبنان جوا عندنا

إلا ذيك الرفسة التي تطير الباب صدق ان بيبانا مقاومه وقويه والا كان تكسرت من زمان

قومي قام عصبتس للحين نايمه دخلنا على اليوم الثاني وانتي فاطسه يالخيشه
تجي أمي وتشغل اللمبات كلها ..وتسكر المكيف وطبعا لضيق الوقت ووجود الاسلوب الراقي جدا مادريت الا والطشت الاحمر ينقلب علي واسبح بسريري

وتبدأ الاسطوانة اليومية

ليه ما تقومين تصلين الفجر والظهر في وقتها مو تحترين وقت االعصر يدخل وأنتي خايسه في مرقدتس يا بنيتي خافي ربك في الملائكة اللي على كتفك ..

أنا : لا حول ولا قوة الا بالله والله يا يمّه .. وش فيتس اليوم مصحيتني بدري ..

أمي : وش بدري جعلتس ماني قايلة ما بقى شي اليوم وراح .. وأنت خايسه في مرقدس

أنا : بشويش يعني لو قمت بدري غير أني أموت حر وأتصبب عرق وش بأستفيد .. اطلع للكورنيش ولا أمر السينما ولا أتمشى في السوق ولا أقول لك بروح النادي يمه خليها على الله صيفنا معروف يالله من فضلك نوم ونت

أمي : خل عنتس الحتسي في السياسة .. وقومي يالله وصلي الفروض اللي عليك وأنزلي تقهوي معنا على بال ما يقومون اخوانتس و نتغدى
أنا : أبشري بس أنت اسبقيني ..وشوي وألحقك ...


بعد كل هالصجه والمياه اللي غرقتني بسريري

وافتح عييناتي وانا احسب الساعه 1 بالليل واناظر ساعتي فاذا هي تشير الى الــ 1 ظهرا

يالله صباح خير

قمت فزعه من نومي ووجهي ملئ بالتعابير الهادئه الوديعه فحتى هذه اللحظه لم استوعب ما حصل >>يمديكم على الفصحى

ناظرت خشتي بالمرايه جاني احباط قوووي شوشتي منتفشه ومتعربده تقل عراده عبده
وعيوني ما ادري وين أراضيها جلست ساعة ادورها بالاخير لقيتها غايصه بين خدي وجبهتي وشعر الحواجب مغطيها

المهم بعد ربع ساعه اطلع من غرفتي متوجهه الى صاله منزلنا الفاخره

وألقى قيس مجنون ليلى ( ابوي) متوسط الصالة وليلى (أمي) تقهويه وأروح لهم ......

أنا : يمه وش غدانا اليوم ... عساه شي يسوى بس

أمي : سليق .. أبوك من زمان وهو وده فيه

أنا : سليق وووععع ..أقول خلي الشغالة تصلح لي خبزة جبن وترقيها لي فوق في الغرفة بأكلها وأنا على النت

ابوي : وجع يوجعتس ذي نعمة الله استغفري ربتس لا يخسف ربنا بنا نعمة الله ما ينقال لها وع ووش هالنت اللي تربضين عليه الفجر والظهر أول ما تصحين من النوم

أمي : يا ابن عمي )) يحليلتس يمه بتسوين سوريه)) هالنت مدري وش هو شي بلانا الله به .. ما غير مقابلته أربع وعشرين ساعة

ابوي : وش هالنت لا يكون شي حرام بس ولا شي يجيب ما حرم الله

أنا : اقول بس أرقى أشوف ايميلي واشوف وحده من البنات اون لاين أسولف معها يالله باي


ورقيت فوق لغرفتي ..وجلست على النت الى العصر

وشوي الا جوالي يرن واشوف مكتوب سوير النشبه تتصل
وارد عليها

الا ذيك اللي مسوي ياي ودلوعه : هااااااااااي نمـلهـ

انا : وعليكم السلام سلمي بلا هاي بلا خرابيط مالها داعي

سوير: ياربي عليتس خلينا نلعب على روحنا ونسوي دلوعات

انا: اقول اخلصي بس وش عندتس داقه علي ما صدقت على الله تنقلعين من عندي امس

سوير: ابد ياقلبي بس اشتقت لصوتس

انا: تشتاقت لتس العافيه خلصيني وش تبين ؟؟

سوير: اليوم دقت علي وحده من البنات وتسولفلي عن مطعم راحت له تقول انه حلو مرررره وش رايتس نروح له؟؟

انا : لا مشتهيه تميس وفول خلينا نروح للقرموشي احب هالمطعم

سوير : يالقرويه اقولك مطعم ايطالي تقولين قرموشي يالله بس بتروحين معي والا ادق على نوير اصرف منك

انا : طيب خلاص باروح واشوف اخرتها معاتس

سوير : اوكي بعد العشا نروح يالله بااااااي

انا : اوكي بااااااااااي
.
.
ونروح للمطعم



دخلنا ويقابلنا الجرسون

الجرسون : آهلين صبايا فيي أخدمكن
انا : ابد سلامتك ..نبي نأكل عندكم...
الجرسون : شو حضرتك شو عم تئولي . .
سوير : قصدها أحنا تونا جايين من سوق الحمام واشتهينا نمر هنا نتعشى
الجرسون :ممكن أعرف إذا عندكون حجز ولا لا ...
انا: وش الي حجز يا سوري قريح .. لعنبوا بليسك في ديرتنا وتبينا نحجز .. انقز جب لنا اي شي أحنا نبي نأكل ونمشي مهوب ناخذ غرفه ..

سوير : (بكوعها على بطني ) هاه لا ماعليك منها .. تحب تستخف دمها مرره .. لا صراحة ما حجزنا بس يعني لازم نحجز ما في حل ثاني ؟؟؟!!!

الجرسون : يا عيب الشوم ولو بس حبيت اسأل إذا في حجز ولا لا على العموم تفضلوا معاي ..

انا : نبي تحط لنا بارتشن مو نقعد نسرق بالاكل تسريق...

الجرسون : شو !!!! ما عنّا بارتشن وما بارتشن كله على بعضه إذا هالشي ما بيناسبكن يعني ..

سوير : لا يناسبنا يناسبنا ما عليك أنت بس أمش قدامنا لا بوك لابو من وضفك هنا
التفاته خطافيه من الجرسون : شوووو

انا : لا لا ولا شي قم انهج وشف لنا طاوله لأستعد على وجهك

ويجي الجيرسون ومعه المنيو ويعطينياه ويمشي ..

و اقلب راسي في المنيو أبي القى كلمة شيكن , رايس أي شي أضعف الايمان قمت ادور كلمة سلطة ..وصراحة ما أنلام. على عيني وراسي المطعم يقدم وجبات ايطالية واسبانية ومدري ايش بس مو اسامي ما تنفهم ..أكلة اسمها رافييللي وأكلة اسمها سوفيليه وثانية اسمها فوندوم واكلة اسمها فهيتا صحن حلى اسمه ماسيتو الظاهر ينطق كذا

انا : سوير وش اكلهم الزين ؟؟
سوير: يا ربي ع التوهيقه والله مدري خلينا نصبر لين يجي ونشوف

الى أن لاحظ الجرسون اننا ندربي روسنا و مغرزات في هالمنيو وقرر يساعدنا

الجيرسون : عفوا .. شو بتحبوا تأكلوا حضراتكون ..

أنا : أترك المنيو حقتكم على جنب ..أنت وش تنصح به ..يعني وش لو أنت هنا مكاني وش كنت بتطلب مني لو أنا هناك واقفه مكانك << يلعن ام الشرح

الجيرسون بعد ان ترسمت علامات الدلاخه على وجنتيه : عفوا شو تفضلتي حضرتك ...
سوير : ما عليك منها ..هي تحب تستهبل عندكم بروستد .. >> كبت العشا

أنا : احم احم جتني الشرقة كاس موية ..سوير قصدها تقول أنها تبي طبق اليوم اللي بالدجاج لأنو عندها حساسية من السمك ..قبلها الله يعافيها إذا أكلت سمك تشب فيها الحساسية ..

الجيرسون : وأنتي شو بتحبي تطلبي .. كمان ما بتحبوا طلبات جانبية شوربات سلطات ...أي شي ثاني
أنا : شف أنا عاد أحب اللحم عطني الطبق أبو لحم >> علشان أذوق الدجاج واللحم
و سلطة على ذوقك

الجرسون: ما بدكون شي تاني معون
سوير: الله لا يهينك 2 حمص .. وقل له يكثر الزيت ..>>> للمره الثانيه تكب العشا

وانا اللي اناظر بعين حاره واقول : سوير يا حبيلك يختي يكفي مزح لأقوم وارتع في بطنتس

جينا في العصير .أنا فرحانه بأني في مطعم كشخه ويقال لي متعوده وحاطه عطر مغاسل

اقول للجيرسون ابي عصير بردقان فريش ويكون كبس

وما شفته الا يبزر عيونه في وجهي كأنه يقول لي وش تبين انتي


الجرسون: اذا بدك عصير برتقال اديك سي بانييه حلو كتيير
واخترته وانا قسما بالله ماعرف وشو
الجرسون لسوير: والانسه التانيه شو بتشرب ؟؟

سوير :جب لي بلاك فورست

انا فكيت خشتي يوم سمعتها تقول له بلاك فورست هذا اللي ما كنت اتوقعه ......
أن سوير بنت امها وابوها تشرب خمر

وقلت لها وأنا أشهق تشربين خمر يالفاسقه وجع

وتضحك هي وتقول لي دمتس خفيف والله مدري وشو بس صديقتي تقول شربت عندهم بلاك فورست يجنن خلينا نشوف وش سنع هالبلاك فورست


وياليت هذي بعد كانت آخر أحراج لي ....


انما الاحراج الحقيقي أنك تأكل لأول مرة بالشوكة والسكين بدون ملعقة قدام الناس
..يعني جالسه اتأمل في الرز وشلون بأكله بالشوكة والمصيبة الأكبر ذا اللحمه الي لازخينها فوق وشلون باقطعها
..يعني اللحم ما نقطعه الا بأيدينا


وماغير أكل رز بالشوكة ومخليه الطاولة ماشالله علي مزرعة ارز .. وعضيت اللحمة باسناني
وأنا أقول ( امم انمماا امم اماااا ) يعني مدري وشلون هالمطعم على سمعته بس لحمتهم قاسية ماتنقطع بالسكين

والتفت الا اللي بالطاوله اللي جمبنا كنهم يقولون وش تبين بالدنيا يالقرويه

واحط اللحمة في الصحن وأنا في غاية التحطيم وجلست أحط حرتي كلها في هالسي بانية ..العصير اللي ماني عارفه له طعم بس حامض مرة أغرغره في حلقي ..كانه مطهر فم من كثر ماهو حامض ومرة اسوي فقاقيع

وانادي الجرسون

الجرسون : اأمروا بدكون شي

انا : هالحين منهو الفاهي الي يشتري لكم اللحم .. وش ذا اللحمه ولا لو انها لحمة فحل كان انقطعت بسرعه

الجرسون : والله ما بعرف شو بتئولي بس بتمنى ان الاكل عجبكون .. بدكن شي

انا : سلامتك بس الفاتوره الله لايهينك

وشوي الا يجيبها واشوف الرقم 70 ريال وجمبها نقطه مدري ليش حاطينها

واطلع 40 وسوير بعد 40 المجموع يعني 80 قلنا مسيكين هالضعبف من دخلنا وهو يقول بنا يادهينه لاتنكتين
واناديه واقول الزياده اكراميه مننا الك >>> وجه وحدتن مسويه حاتم الطائي

ويعد الفلوس وتبزر عيونه شو اكراميه وشو الك وين باقي المصاري ازا بتريدي

قلت لا تخاف ماراح نعلم احد اننا بقششناك

قال يا انسه بليز افهمي عليي انتي حاطه 80 ريال وفاتورتك 700 ريال وين الباقي؟؟
انا : يا خف دمك بس يالله بس مع السلامه

الجرسون : انسه بدك تخربي بيتي مين اللي بيدفع بدالك والله لو عندي بدفعها من عيوني >>> ياكثر نصبهم هاللبنانيين

سوير (بصوت واطي ووجه طاقته الروعه) : شكله يمزح

انا: تستهبل انت وش 700 الله لونا طالبين ذبيحه كلها صحنين وعصيرين وقطعتين حلى
الله يقلعتس بس يا سوير ياليتنا ماكلين في كبدة سعيد ولا من شاورما جنيه كان اصرف واحسن


ونطلع الباقي ونطلع من المطعم الله لايعيده من مطعم

الى اليوم وبوكي فاضي عقب ذيك الروحه بس الله يخلي لي اهلي


وتوته توته خلصت الحدوته



ما يستفاد من السالفه :

1 / لا تنسوون تسقون زرع الجيران وتخرفون نخلتهم على طريقكم

2/ احترموا اهلكم ولاتصيرون عاقين

3/ مو كل ما مدح لكم احد مطعم نقزتوا له واعرفوا ايش بتطلبون قبل لاتعتبون باب المطعم

4 / خذوا لكم دوره اتيكيت واصول الاكل بالشوكه والسكين

5 / لاتغترون باعماركم وتسوون كريمين وتحطون اكراميات يكفي بس تدفعون اللي عليكم

6 / الي اعجبه الموضوع يرد .. والي ما اعجبه يرد ويقول مشكوره لأني جلست ست سنين اجمع افكاري فيه



مشكووووووورين لانكم عطيتوني بعضا من وقتكم الثمين وقريتوا خنبقتي


موفقين

المصدر: منتديات لمني بشوق - من قسم: (✿) الضَحَك والفرفشَة