|
|
|
| الإهداءات |
| أهلا وسهلا بك إلى منتديات لمني بشوق. |
| أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا. كما يشرفنا أن تقوم بالتسجيل بالضغط هنا إذا رغبت بالمشاركة في المنتدى، أما إذا رغبت بقراءة المواضيع والإطلاع فتفضل بزيارة القسم الذي ترغب أدناه. |
|
||||||
| (✿) يُحْكَى أَن .. الْتِقَاطَة مَشْهَد وَصِيَاغَة حَدَث وَقَص الْحِكَايَة بِأَقْلَامَكُم , حِيْنَهَا نَقُوُل يُحْكَى أَن .. |
 |
06-23-07, 09:12 PM
|
#1 | ||||
|
...((يا عيونه بس يكفيني عذاب))...
...((يا عيونه بس يكفيني عذاب))...
الجزء الأول... .......:شذى حبيبتي في ناس خطبوك من أبوك... شذى وهي مستغربه: هلا يمه شتقولين في ناس خطبوني؟ ام محمد وهي تناظر بنتها الوحيده:إيــــه خطبوك وينتظرون الرد عشان يجون يخطبون رسمي.. شذى بفضول : مين هم...انا اعرفهم ؟ ام محمد: لا ما تعرفينهم...ولا أنا اعرفهم بعد؟ شذى: إذا انا ولا انت نعرفهم مين يعرفهم؟ ام محمد : خالد اخوك يعرف المعرس... شذى وهي تناظر امها: مرة وحده معرس زين يمكن ما أوافق...يا خوفي بس يطلع زي راكان اللي قبله ما يعرف... امها تقاطعها: اخوك خالد يمدح فيه ويقول مثله ما ينرد... شذى: يعني بس خالد يعرفه..... امها وكأنها تذكرت حاجة: انت بعد تعرفين خالته اخت امه... شذى باندهاش: خالته اعرفها انا ؟ من تقصدين يمه ؟ امها وهي تبتسم: فكري ...تتوقعينها مين؟ شذى وهي محتارة: مين من الجيران او من اصدقاء العيلة؟؟ امها: ما حزرت....و باقولك حاجة ترى اهل المعرس مو من الشرقيه؟ شذى واندهاشها زاد: مو من الشرقية...وانا اعرف خالته واخوي خالد يعرف مرس الغفلة...ومثلة ما ينرد.....يمه خلاص تراني خلاص وصلت حدي قولي لي مين وماله داعي هالفوازير اللي انت مسويتها.. امها: اوكيه بقولك... تقاطعها شذى بضحتكتها الرنانة: هههههههههه احلى يمه اوكيه هذي من وين جابيتها....والله الوالده حركات..اوكية..بكرة ايش رح تقولين...تشاو...ههههههههههههه ام محمد : تضحكين على امك هاه؟ زين يا شذى موتي بفضولك نامي الليلة بدون ما تعرفين عريس الغفلة على قولتك... شذى وهي تحاول تكتم ضحكتها : خلاص يمه والله آسفه بس بالله من اللي علمك عليها أكيد سعود ما غيره صح ام محمد: ماني بقايله زين... شذى قامت وحبت فوق راس امها : خلاص السموحة يمة بس قولي لي من المعرس تكفين يمة الله يخليك الله يوفقك الله يـ.... ام محمد تقاطعها: خلاص زين زين باقول عاد انتي تلصقين بالواحد إلين يقولك.... شذى: زين مين المعرس؟؟؟ ام محمد: خالته تراها معيدة بالكلية عندك بقسم لغة عربية؟؟ شذى والفضول ذابحها: بالله عندي بالكليه وبقسمي بعد مين هذي؟ ام محمد:اسمها عبير...عرفتيها؟ شذى والبسمة شاقتها: من جد ونااااسة الصراحة اذا هو على خالته رح يكون جنتلمان... ام محمد باستغراب: وش جنتلمانه انتي وخشتك؟ شذى وهي مبسوطة:ما عليك مني...زين اذا هو مش من الشرقيه اجل من وين؟ ام محمد: من الرياض... شذى وهي تناظر امها: من الرياض...وجا الشرقية يخطبني...ليه خلصو بنات الرياض عشان يدور برا... ام محمد:يقول لاخوك خالد احنا ندور على العرق الطيب... شذى: اوكيه يمه قولي لي عنه نبذه مبسطة و موجزة اكيد خالد قال لك شي عنه لو بسيط؟؟ ام محمد: خالد يقول ان اسمه تركي وهو ضابط وان عايلته مشالله عليها ناس معروفين بسمعتهم الطيبة ويقول ان ابوه واخوه الكبير يشتغلون في التجارة وعندهم خير... شذى وهي تبتسم: ضابط يمه انت تتكلمين من جد؟ ام محمد: تعرفيني يا شذى انا ما احب المزح في امور الجد اللي زي كذا شذى:زين اسفه يمه...كملي ام محمد: بس هذا اهم ما قاللي اخوك... شذى بضيق: شوفي يمه قولي لي حتى الفتافيت اللي قالها السيد خالد زيــــــــن ؟؟ ام محمد: اوفففف زين بقولك...يقول ان تركي هذا جاء الشرقيه في دورة مدة ستة شهور وخالد خويه يوسف تعرفين في العسكريه بعد...يوم جا تركي دورته العسكريه كان يوسف معه اللي صار ان يوسف عزم تركي كذا مرة ونادى خالد اخوك....يقول عنه رجل والنعم فيه ما في مثله اثنين شذى وهي تناظر امها بنص عين:كذا عزيمة تخلي تركي هذا...يخطب اخت خالد اللي شافه مرات معدودة هاه؟.. ام محمد وهي تضرب بنتها بخفه على كتفها: يا النبيهه توني اقولك خالته عندك بالكليه اكيد سألها عنك ومدحتك له(واخذت ام محمد تمسح على شعر بنتها) والله وكبرتي يا شذى وبنزوجك... شذى وهي تبتسم لأمها:اكيد باكبر يا يمه مثل الناس...يعني تبيني اصغر مثلا؟...بس يمة كيف عرف تركي اني انا اخت خالد ادرس عند خالته هاه؟ ام محمد: خالته هذي عبير كلمتني وهي اصلا اللي دلته علينا بس لقاء تركي بخالد كان صدفة... شذى: يمه توك تقولين ما اعرفهم... ام محمد: والله ما اعرفهم هي كلمتني وعرفتني بنفسها و قالت لي الموضوع وخالد كلمه تركي وينتظرون الرد عشان زي ما قلتلك... شذى: ارد على واحد ما اعرفه الله يهداك يمه.... ام محمد: اخوك يمدحه وانتي توك تمدحين خالته... تقاطعها شذى : بس هذا ما يكفي يمه لازم نشوفهم ونسأل عنهم زين وبعد كذا لكل حادث حديث... ام محمد:خلاص يعني انتي ما عندك اعتراض للحين؟ شذى:اعترض على ايش؟؟ ام محمد: يعني يا حبيبتي انتي مو معترضة(وبغت شذى تقاطعها) اسمعيني للآخر خليهم يجون ونشوفهم وبعدها نسأل عنهم اذا طلعوا اهل خير الله يحييهم واذا كان غير كذا ننهي الموضوع من اوله ولا كانه صار شي.. اعجبت شذى براي امها: يمشي اللي تقولينه يام محمد.. ام محمد:الله يحفظك يا شذى ويكتبلك اللي فيه الخير... وقامت ام محمد عن بنتها وطلعت من غرفة شذى عشان تقول لابو محمد براي بنتهم الوحيده شذى عمرها 19سنه اصغر وحده في اخوانها وحدانية بين ثلاثة اولاد حلوة مملوحة وهي طويلة وجسمها روعة و يسمونها البنات باربي من حلاوة جسمها و شعرها لآخر ظهرها حلو وكثيف وناعم وهي بيضاء صافيه تميزها بحة صوتها الناعمة وهي طيبة وحبوبة و شذى مجنونة بالموضة والأناقة.. اخوانها محمد اكبر واحد عمره 33 يشتغل مساعد طيار بالخطوط السعودية متزوج مريم ومريم هذي ملقوفة وفيها لعانة احيانا تكون ملكة الطيبة واحيانا العكس وعندهم بنتين ريم 5سنين و رنا سنتين ومحمد ومرته ساكن مع اهله بحكم سفره الدائم ما يقدر يخليهم لوحدهم عشان كذا ساكن مع اهله.. خالد 28سنه ثاني واحد متزوج بنت عمه مها وساكن بفيلة جنب اهله وهو يشتغل مهندس بناء سعود24سنة توه راجع من برا كان يدرس بجامعة اكسفورد ببريطانيا واول مارجع تعين مدير علاقات عامه باهم الشركات الكبرى بالشرقية هو احلى اخوانه واملحهم بس طبعا بعد شذى... .................................................. .............................. ام محمد بعد ما طلعت من غرفة شذى كانت بتروح لغرفتها إلا شافت رنا بنت محمد طايحة تبكي على الأرض... ام محمد: وش فيها راني تبكي...(وشالتها من الأرض)...وش فيك يا رنا تبكين؟ إلا تجي مريم وتشيل بنتها من يد ام محمد وتقول وهي معصبة : خالتي ما تشوفينها طايحة على وجهها اكيد بتبكي... ام محمد : وش فيك معصبة ؟؟ مريم : ما فيني شي بس بنتي طايحة...إلا شسالفة الرجال اللي خاطب شذى اسمعكم تتساسرون فيه ولا حد قال لي او افكر يقولي حتى مها مرة خالد تعرف السالفة وانا آخر من يعلم... ام محمد تركتها لأنها ما تبي مشاكل ومشت عنها وقالت: ما حصل شي واذا صار شي قلنا لك .... معروف عن مريم اللقافة واللعانة...بس قدام محمد حمامة سلام ...الكل منقهر منها حتى شذى بس دايم يوقفونها عند حدها ومحد يشكي لمحمد منها لانهم شايفينه يحبها ومرتاح معها.. مريم قعدت تاكل بنفسها من القهر لأنها ما تعرف شي في السالفة ومنقهرة من محمد زيادة لأنه اكيد بيعرف ولا قالها مع انه زوجته وام عياله... ________________________ المصدر: منتديات لمني بشوق - من قسم: (✿) يُحْكَى أَن .. |
||||
|
|
06-23-07, 09:13 PM
|
#2 | ||||
|
رد: ...((يا عيونه بس يكفيني عذاب))...
وفي الرياض...
متعب: احلى يا تركي بتاخذ لك شرقاويه هاه تركي وهو يبتسم لاخوه: شفت اخوك مب هين متعب وهو يغمز لتركي: اهل الشرقية اهل الدلع يا تركي هنا يتدخل اخوهم الكبير بندر: شوف يا تركي اذا المرة اللي بتاخذها زينة حلوة...لا تنسى اخوك الكبير عشان اذا عجبتك باخذ اختها... تركي وهو يناظر اخوه بندر نظرة سخرية: ما تقدر لأن المدام مارح توافق على هالشي...وبعدين خلك مرتاح ماعندها خوات... بندر وهو معصب: وش دخل مرتي في السالفة هاه؟ متعب وهو يكلم بندر: بندر يا عمي خلك مع بنت عمك ام فارس احسن لك... بندر ابو فارس: امزح على طول صدقت انت و اخوك..... الكل ضحك عليه لما قال كذا بندر: المهم ما علينا تركي لو تاخذ لك وحده من بنات عمانك او خوالك احسن لك تركي: خلاص يا بندر قفل السالفه تعرف ما حد منهم عاجبني او حتى داخل مزاجي متعب وهو يكلم بندر: تذكر بعض الناس يوم دموعهم اربع اربع لما خلصوا الثانوية توهم بزران يبون يتزوجون بنت عمك سلمى... تركي وهو يضحك: عادكم تتذكرون انا نسيت السالفة تدرون لها 8سنين يعني فيه ناس ماتوا وناس ولدوا وناس تزوجوا وتطلقوا وانتم عادكم فيها بندر ابو فارس: لا مو عادنا فيها بس تقول مو عاجبينك بنات عمك.. تركي بضيق: هذا حب مراهقه حب عيال...وبعدين خلاص انا بتزوج يعني خلاص قفلوا عليها... ويقوم تركي عنهم .... ابو فارس: وين تعال ...خلاص بنسكت... تركي وهو ماشي:لا تسكتون كملوا كلامكم...بس ياليت تبعدوني وما أكون محور حديثكم.... متعب: اقول تركي وين رايح؟ تركي:بروح مع واحد من اخوياي عازمني على العشا...ويناظر تركي ساعته...شفتوا اخرتوني الساعة تسعة ونص ونا متفق على الساعة تسع... متعب وهو يضحك:لما تودع العزوبية وتتزوج لازم تكون تسع ونص بالبيت مافيه سهر برا البيت...مافيه تاخير... تركي وهو يبتسم:خير ان شالله انا لما اتعدل يكون بمزاجي وبراحتي... وطلع تركي ... تركي وهو في سيارته رايح لموعده... دق جواله... ....: تركي تركي:هلا والله يباه... ابو بندر: تركي توني مسكر من ابو محمد ويقول حياكم الله ... تركي :يعني موافقين... ابو بندر:أكيــــــد...ومن يقدر يرفض تركي ولد عبدالله... تركي:أخذت منهم موعد... ابو بندر: إيه على الخميس الجاي بنروح الشرقية ....والله يعين على اختيار خالتك... تركي:إن شاء الله خير .... ابو بندر:إن شالله تامر على شي؟ تركي:ما يامر على عدو... ابو بندر:في حفظ الله.. تركي:مع السلامة..... ويقفل الجوال تركي ويفكر في مسقبله مع بنت ما يعرف عنها إلا اسمها .... تركي عمره سبعة وعشرين سنه شاب الكل يحلم فيه وسيم لدرجة تبهر الاعين ورجل خلوق وطيب يحب الاعتماد على نفسه في كل الامور رفض يشتغل مع ابوه وحب يعمل لنفسه ومستقبله دخل العسكريه لأنها حلمه من صغره ودايم يقول عنها مصنع الرجال...عيبه عصبيته الزايدة وغروره الزايد ويبي اللي معاه يمشون مثل الساعة يعني بدون اخطاء... هو ترتيبة الرابع في العائله... اكبر واحد ابوفارس بندر 40سنه متزوج عائشة بنت عمه بعده فاطمة 37سنه متزوجة ولد خالها ناصر وبعدها متعب 30 سنه متزوج سارا بنت عمته وبعدين تركي... وبعدين آخر العنقود بشاير18سنه حلوة ودلوعة... ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ يتبع الجزء الأول... في بيت شذى وبالتحديد بغرفتها مع صديقتها ريم... ريم:الصراحة ما نقدر نتكلم خاطبك ضابط بناء على رغبتك وحلمك... شذى وهي تناظر رفيقتها بفرح: شفت شلون... وتزيدها ريم: لاااااااااااااا وبعد مثل ما تمنيت تسكنين بالرياض... شذى وعيونها بتطلع:أنا؟؟؟ متى قلته؟؟؟......... ريم بنص عين:لا تحاولين تنكرين(وتقلد صوت شذى)ياربي ياليت إحنا عايشين بالرياض مع بنات عمي سعد بدل هالرطوبة والحر اللي بالشرقية ذابحنا... شذى وهي تسند ظهرها على الكرسي: هذا بس كلام وخرابيط.... ريم: إلا تعالي قلتي رح يجون يوم الخميس يعني(وتحسب ريم على اصابعها)يعني بعد خمس ايام شذى: يالله مرة قريب... ريم:بتشوفينه ويشوفك مثل ما قلت قبل شوي؟ شذى:yes ريم:يعني سألتو عنه؟؟؟؟؟؟؟؟ شذى وهي تتربع وتعدل جلستها: طبعا ما خلى أبوي الله يحفظه أحد بالرياض نعرفوه إلا خلاه يسأل وشغل فريق التحري حقه بالرياض يسال عنه والنتيجة هي...إنهم مدحوه ومدحوه أهلة بعد... ريم وهي تضحك:بالله من فريق التحري هذا؟؟؟هههههههههه شذى وهي تضحك من ضحك صديقتها: هذول الله يسلمك يتكونون من ثلاثة أبطال هم عمي سعد وخالي فهد و خويه عبدالهادي... ريم وهي تضحك:يعني النتايج تطمن... شذى:ع الآخــــــر... وظحكوا.... وبعد فترة سكوت طويلة بينهم... قامت شذى من على الكرسي وراحت وقفت قدام المرآية وقعدت تتأمل نفسها وبعدها لفت على ريم : ريم تتوقعين تركي بيرفضني.......لو رفضني والله أنهار إلا أموت...تذكرين أمل يوم رفضها خطيبها لما شافها البنت نهارت مسكينة... ريم بجدية:شذى؟...إيش هالكلام أساسا مافي مقارنة بينك إنت وهي...صدق إنها حبوبة وطيبة بس إنت احلى...أساسا مافيه مجال للمقارنة بينك وبينها...هي جمالها متواضع مرررة شذى: ولو...الجمال مو كل شي بالحياة أهم شي الراحة النفسية...يمكن مايرتاح معاي... ريم: ما أدري شقول لك...بس احسن حل صلي استخارة واطلبي من الله إنه ينور بصيرتك شذى:صليت استخارة وهذا دايم ادعوا الله إنه يكتبي لي الخيرة... ريم:الله يوفقك... شذى تقرب من ريم:ريم شوفي ألحين بفتح الباب وبلقى مريم تحاول تتسمع... ريم وهي تحط يدها على راسها:ياربي...هذي ما تشبع دايم تتصنت؟؟ وتقوم شذى وتاشر لها على الباب وبخفة سريعة تفتح الباب ومثل ما توقعت مريم قدامها تسوي نفسها رايحة لغرفتها لأنها قريبة من غرفة شذى... شذى وهي حاطة يدها لى خصرها:إنت شتسوين هنا؟؟؟ مريم تحاول تخفي ارتباكها:رايحة لغرفتي(وتقوي عينها وتقول بعصبية)ولا لازم آخذ الأذن من آنسة شذى قبل لأروح غرفتي هاه؟ شذى بتحدي:إيه لازم زين؟...وبعدين ترى حركاتك مكشوفة... مريم بعصبية:أي حركات؟ وتدّخل ريم وتسحب شذى على داخل الغرفة... ريم لمريم:هلا مريم... مريم ببرود:هلا... ريم لشذى:خلاص يا شيخة بلى مشاكل؟ شى بقهر:تقهرني يا عالم...أنا متأكدة إنها تتسمع بس.. ويقطع حديثهم صوت جوال ريم... ريم:هلا...وين أنت؟...أوكيه لحظة....اوووووه زين خلاص جايية....لا تاكلني...بااااااي... شذى:مين اخوك؟ ريم:إيه تحت ينتظرني... شذى: طبعا تجين يوم الخميس... ريم وهي تاخذ عبايتها:بشوف... شذى: وش تشوفين تجين يعني تجين.... ريم تلبس العباية:بشوف...وبعدين التليفون بينا... شذى:مثل ما قلتي...بينا التليفون... ريم:أوكيه يلله باااي... شذى:بااااي...ترا اليوم بكلمك... ريم وهي طالعة: في انتظارك........ وبعد ما راحت ريم دخلت شذى غرفتها و وراحت وانسدحت على فراشها وقعدت تفكر... غربية؟؟ليش اختارتها عبير من بين البنات...ليش ما اختارت ريم مع إن ريم املح منها واحلى بكثير...زين يعني يمكن وجود عبير معها كان صدفة ووجودهم الثنتين بنفس المكان صدفة...او يمكن هي اختارتها لتركي...طيب ليش مادور في الرياض اكيد بيلقى سكان الرياض بالملايين الله العالم... ريم صديقة شذى حلوة وأحلى من شذى بكثير بس هي وشذى صديقات من الطفولة... .................................................. .................. |
||||
|
|
|
06-23-07, 09:15 PM
|
#3 | ||||
|
رد: ...((يا عيونه بس يكفيني عذاب))...
في غرتهم...
مريم بعصبية:ليش ما قلت لي يا محمد إن فيه أحد خطب أختك؟ محمد وهو تعبان متمدد على فراشه:نسيت... مريم:ولو هذا مو عذر... محمد معصب:خلاص نسيت يعني ما أنسى؟.... مريم:زين تدري إنهم بيجون يوم الخميس هذا؟ محمد:من قال لك؟ مريم:شذى قالت لي...(كذابة تتصنت عليها).... محمد بينام خلاص:حلو...خلاص مادام شذى قالت لك خل تقولك الباقي... مريم بقهر:ليش ما تقولي إنت؟ مو إنت زوجي؟ محمد: بكرة وراي سفر لجدة والمدينة خلاص خليني انام... مريم مقهورة:زين...بس بكرة نكمل كلامنا على الفطور ... محمد بضيق:خير إنشالله... وبعدها نام محمد لأنه تعبان طول اليوم في المطار وبالليل راح المستشفى يزور خوية...وبعدها معزوم وما وصل البيت إلا متاخر ولقى مريم تنتظره يدري غنها صاحبة مشاكل بس حبوبة... محمد عصبي ويحب اهلة ومرته وما يرضا لهم المهانة وبنفس الوقت ما يبيهم يغلطون.... .................................................. ................ في الصباح على الفطور......... ام بندر: تركي لا تزال مصمم على رايك؟... تركي زهق من هالسالفة: يمه خلاص كفاية خلاص خطبنا وبنروح نشوف العروسة.... ام بندر:بس انا... يقاطعها تركي:على عيني وراسي بس بلاها سالفة إنتي تبيني ارتاح خليني على ما انا عليه... ام بندر:ناس ما نعرفهم مهوب احسن من ناس نعرفهم منا وفينا... تركي وهو يشرب الشاي:يمه...لما سألتك بالبداية وافقتك وألحين تعترضين ما يصلح يمه بعد ما كلمناهم ترضينها لبشاير؟؟ ام بندر:لأ.... يا تركي خالتك هي اللي دلتنا عليهم ويمكن بعدها ما تعجبك العروس وبعدين بس هي اللي تعرفها؟ تركي:وانا اعرف اخوها...مشالله عليهم....وانا استخرت و ربي ريح قلبي لهالشي.... ام بندر:بس عندي سلمى بنت عمك احسن ...او جواهر بنت خالتك... تركي وهو قايم من الفطور:ما ابي لا الاولى ولا الثانية انا اعرفهم واحس ما بقدر اعيش معهم.... ام بندر:كمل فطورك؟ تركي:الحمدلله شبعت...بعد وراي دوام... ام بندر :الله يحفظك....... بعد ما طلع تركي... قعدت ام بندر تفكر صح هي اللي غلطت في البداية ما اعترضت يوم الخطبة صارت رسمي توها تتكلم بعد ما يصير هذا مو من الأصول... .................................................. .... مريم:انا اشوف إن شذى مهوب صغيرة على الزواج خلها تتزوج ونفتك مو كل ما يجيها عريس تدور لها حجة وترفضة محمد:كيفها....إنت شيخصك؟.... مريم بعصبية:كيف ما يخصني؟ محمد وهو يعدل شماغة: شوفي حبيبتي هذا وانا اخوها ما تدخلت فلا تدخلين احسن لك...انا وإنت مالنا شغل... مريم تحرضه:بس هذي اختك؟ محمد وهو يناظرها:وهذي حياتها لوحدها إذا استانست لوحدها وإذا حزنت بعد لوحدها فلا ندخل فيها....... مريم:............ محمد: زين إنك عرفت إذا انت فاضية اقعدي مع بناتك شوي مو قاطتهم على الشغالة مريم:مين قال قاطتهم اصلا انا طول اليوم معهم... محمد:باين...وهذا انا اشوف بعيوني... يتبع الجزء الأول... يوم الخميس... بغرفة شذى..... شذى بارتعاش: يمه انا خايفة يا ريم احس خلاص بموت من الخوف... ريم وهي تمسك يد شذى:خلاص يا بنت ايش هالحركات كلها نص ساعة وتشوفين المعرس؟ شذى: ريم لا تقولين كذا لك ثلاث ساعات الحين وانتي تحسبين الوقت باقي ساعتين باقي ساعة باقي نص ساعة يعني وبعدين؟؟ ريم:زين وليش ما احسب لك الوقت انا بعد تراني متوترة مثلك اذا هذا الشي يوترك يا.........يا عروسة... شذى وهي معصبة: جب زين....عروسة بعينك... ريم وهي حاطه يدها على صدرها: بسم الله علي وشفيك معصبة حد ضربك؟؟ انا ما قلت شي يزعل؟؟كل بنت تتمنى انها تصير عروس شذى:ريم تكفين خلاص...انا متوترة مرة ...واحس ماني قادرة افكر والله كأني بامتحان آخر السنه إلا اشد من كذا... ريم: شي طبيعي إنك تكونين متوترة وخايفة...بس(وتناظر ريم شذى من فوق لتحت) انت ووجهك ايش رح تلبسين لا تقولين... تقاطعها شذى: إيه بدخل وانا لابسه كذا...عندك مانع؟؟؟ ريم: إيه عندي مانع...من جد هذا لبس انتي ووجهك...والله كأنك داخلة عزى بأحد ميت... كانت شذى لابسه تنورة سوداء طويله مع بلوزة كم طويل تدرجات البني والبيج و رافعة شعرها بطريقة شوي رسمية وحاطه ماسكرا خفيفه على عيونها... شذى بعصبية: والله؟؟؟ انا عاجبني شكلي كذا...وبعدين عشان مايظن إني انا مو مصدقه فيه وطايره فيه...خليني كذا احسن ... ريم: اتوقع لو يشوفك ينحاش...ابد بيقول داخله علي هذي بالغصب وما تبيني لا تصيرين خفيفه بس لا تسيرين كذا مره ثقيله... شذى: الثقل زين...والبنت الخفيفه ماحد يبيها... ريم: ماقلنا صيري خفيفه... بس شذى تكفين نزلي شعرك عشاني...بيني له انك حلوة...يله نزلي شعرك لا ترفعينه كذا... شذى بعناد: لأ يعني لأ ... ريم: بالله عليك نزليه و هالعناد ماله داعي يا بنت الناس...فلي شعرك وامسكي نصه من فوق بكليب احلى من هذا... شذى:................... ريم باقناع: والله شكلك كذا يقول عمرها 29سنه مو 19.... شذى: لاااااااا...لا تقولين كذا...امانه شكلي كذا اكبر من سني بكثير؟؟؟؟ ريم بمكر: إيـــــــه والله شكلك على حافة الثلاثينات...بس عدلي شكلك شوي عشاني...يالله مو عشاني عشانك نفسك انتي... شذى:.......................... ريم تزيد: شذى والله اذا دخلت كذا احتمال99% انه يرفضك... كذا كأن احد مصفقك...أكيد بيقول هي مجبورة علي وانا ما ابي وحده ما تبيني...فراح ينسحب بنفسه ويعتذر.... شذى: ريم رجاء لا تخوفيني...لهالدرجة شكلي رايح فيها...زين يالله شوري علي وش اسوي..بس لبس ماني مغيرته لو إيش... ريم: بس غيري يا شــ.... تقاطعها شذى: ريم ملابسي مارح اغيرها لو يكون من يكون خليني كذا احسن وعن شعري بغير تسريحته عشانك... وراحت شذى عند درجها وقاد تدور كليب احلى من اللي هي لابسته وطلعت كليب لونه بني مموج ببيج حلو وناعم... ولفت على ريم وقالت لها: ريـم وش رايك في هذا؟؟؟ ريم: إيه هذا أحلى من اللي قبله...ألحين فلي شعرك من تحت وامسكي بس اطرافه من فووق.. وفكت شذى شعرها وقعدت تعدل فيه...وعملت مثل ما قالت لها رفيقتها ريم وبعد ما خلصت... ريم بفرح: إيـــــــــــــه كان كذا احلى من الأول ...بس شذى مقاطعتها بعصبيه: بس إيش بعد ؟؟؟.... ريم: بس كنت ابي اسأل ألحين انتي بتحطين مكياج ولا ايش السالفه؟؟؟... شذى: طبعا لأ...انا بس حطيت ماسكرا وبس ....خليه يشوفني على طبيعتي أحسن... ريم: زين حطي بس غلوس لا تحطين مكياج كامل... شذى:ريــــــم رجاء بلى حنه زيادة على راسي...كذا وبس... ريم: زيــــــن بس اخر شي أنتي بتلبسين اكسسوارت ولا لأ....بس لا تقولين لأ لأنك بجد بتثبتين لي إنك عجوز... شذى: زين إنك ذكرتيني تصدقين والله نسيت... وراحت شذى لعلبة اكسسواراتها وتبي تطلع شي تلبسه...إلا سحبت ريم العلبه منها وقالت لها: انا اللي بختارك يا حلوة...لأن اليوم شكل ذوقك فيه زفت من كثر ما تفكرين... شذى بابتسامه: ريموه...اعطيني العلبه تراني مهوب ناقصه لفلسفتك... ريم برجاء: شذى الله يخليك انا خليني اختار لك والله انك اليوم رفعت ضغطي من لبسك... شذى بمزح: لا تغلطين انتي ووجهك ولا تشوفين الباب هاه؟؟....((تقصد تطردها))... ريم: اقول يله اقلبي ووجهك يا الحولا انا اللي باختار لك... وتجرها شذى من شعرها بمزح: ريـــــم انا حولا يا الحولا لا تخليني الحين احذفك برا.... ريم بصراخ: آآآي....آآآي....عورتيني يالخايسه...ولا تخليني انا ألجأ للسلاحي الخاص اظافيري والعب بوجهك هاه...آآآي شذى تفك ريم: امزح معك يا الهبله...وبعدين انتي من جدك انك تبين تشوهيني واليوم شوفتي؟؟؟.... ريم وهي تعدل شعرها: طبعا لأ...بس عشان تفكيني...وبعدين خليني أنا اللي اختار لك وش تلبسين من اكسسوارات بليــــز؟؟؟... شذى تناظرها بابتسامه: اوكيــــه....خلاص اختاري لي ريم....بس هاه يكون ناعم ما فيه دفاشه... بليز ريم... ريم وهي تحوس بالعلبه وتدور لها: خيـــــر انشالله...بما انك تبين ناعم باختار لك شي حلو... .................................................. ............ بالصاله ببيت ابو محمد اهل شذى... كانت مها زوجة خالد ومريم زوجة محمد وام محمد قاعدين... بينما الرجال قاعدين بالمجلس مع اهل تركي اللي جو لما صارت الخطبه رســــمي.... مريم: مها...ايش قال لك خالد عن خطيب شذى؟؟؟ مها تعرف حشرية مريم ردت عليها: مثل اللي تعرفينه ما شي جديد... مريم: وش دعوة؟؟؟ المعرس من طرف خالد وانت زوجته أكيـــــــد قال لك شي عنه... مها: هو قال لي انهم مشالله عليهم اخلاق وسمعه طيبه... مريم: وفلوس كثيره... مها: مشالله عليك يا مريم هذا انتي تعرفين اجل ليش تسألين هاه؟؟.... مريم: اللي قلتيه شي معروف... وهم معروف عنهم فلوسهم الكثيره.... مها: اطمني من هالناحيه...خالد يقول إنه ما ياخذ ريال من اهله...هواللي يصرف على عمره من راتبه.... من شقاه... مريم:يعني ما ياخذ من اهله فلوس؟؟؟؟... مها:ولا ريال....وبعديـن انتي وش يهمك لو ياخذ او لأ... انتي بتاخذينه ولا شذى؟... مريم:لأ مو قصدي كذا...بس كان ودي اعرف عنه اكثر...لأن محمد قال لي انهم ناس هوامير بالرياض... مها ما حبت انها تكمل كلامها مع مريم فقعدت تكلم خالتها ام محمد اللي كانت ساكته وتناظرهم... مها: اقول خالتي وينها العروس شذى هاه ؟....لي ساعه ونص من جيت ولا شفتها؟؟؟... مريم تقاطعهم: وينها يعني..اكيد بغرفتها مع صديقتها ريم فوق من جات وهم الثنتين بالغرفه ماطلعت لهم 3ساعات... مها وكأنها ما سمعت مريم: والله يا خالتي إني فرحت من قلبي بشذى وبنفس الوقت حزنت عليها مره... ام محمد: ليـــه حزنت؟؟؟... مها:لأن خالد قال لي ان تركي المعرس ساكن بالرياض واكيد إذا الله كتب نصيب بتروح الرياض وبنفارقها والله... ام محمد بحزن:والله نفسي يا مها امس بالليل كانت سهرانه معي ولما راحت تنام قعدت ابكي من بعدها لان فراقها صعب علي... مريم بخاطرها((إلا ابركها من ساعه خليها تذلف وتفكنا هالعله واحسن مافي زوجها انه بعيد منا)) مريم تكلم ام محمد: إي والله يا خالتي فراقها صعب علينا كلنا...وما اقدر اتخيل البيت من دون شذى حتى بناتي بيفارقونها... ام محمد تناظرها باستغراب لأن المشاكل بين مريم وشذى ماتوقف فكيف رح تحزن عليها... فهمت مريم القصد من نظرة ام محمد لها ومن متى هم حبوا بعض فقالت: تدرين يا خاله إن العشرة ماتهون لو يوم فما بالك بسنين... ام محمد باقتناع:صدقت يابنتي العشرة ماتهون...وكل بنت لها يوم تفراق فيه بيت اهلها... مها: خالتي اليوم تركي بيشوف شذى؟؟؟... ام محمد: اليوم إيه بيشوفها وتشوفه...والله انها يامها مره مرعوبه من هاليوم... مها: كل البنات كذا يا خاله واتذكر يوم جا خالد بيشوفني سويت بامي العيــــد من الخوف... ام محمد: بس انتي تعرفين خالد من قبل وشفتيه وشافك بس هي مسكينه ما عمرها شافته ولا شي... مها: وانتي صادقه يا خالتي...بس بعدين بتقعد تضحك على نفسها لما تتذكر..... وفي هاللحظه يدق جوال مريم وترد مريم....وبعد ما سكرت.... مريم: اقول خالتي هذا محمد يبي يكلمك هناك بالصاله اللي بقسم الرجال.... وتقوم ام محمد لولدها.... مها: مريم محمد وش يبي بخالتي؟؟؟.. مريم: شكله يبيها تعدل شذى عشان تدخل تشوفه...لأنه سألني اذا شذى خلصت او لأ.... مها وهي تقوم: اجل خليني اطلع لشذى اشوف اذا خلصت او لأ.... وقامت مها عن مريم..... وراحت مريم لام محمد ومحمد عشان تشوف وش صار بالمجلس عند الضيوف... .................................................. ............... ....:انتي وش يعجبك؟؟...ما يعجبك العجب شذى وهي تلبس عقد ناعم عندها: انا ما يعجبني العجب بمزاجي زين الحمدلله والشكر انتي من جدك ألبس الهبال اللي طلعتيه ريم: أي هبال انتي يالهبله؟؟؟هذا اغراضك انا ماجبت شي من عندي... شذى:أدري...بس والله لو اسمع كلامك بروح فيها...حشى كأني بعرس مو نظره عاديه... ريم بنص عين: نظره عاديه؟؟؟((وتكمل بعصبية)) هذي يا مجنونه بتحدد مستقبلك وباقي عمرك...((وتقلدها)) نظره عاديه... شذى: يعني انتي ووجهك تبيني اكشخ كأني رايحه عرس...اما عليك هبال مو طبيعي... ريم: الصراحة يا شذى ياليتني اليوم ما جيت لأني ما استفدت غير انك رفعت الظغط والسكر عندي.. شذى تجاريها:إي والله...وانا بغيتك عون صرت فرعون... ريم تبحلق بعيونها: انا فرعون يا شذى؟؟؟؟؟؟؟؟؟... بهاللحظة دق باب غرفة شذى... ريم وهي تطالع شذى وتقول بصوت واطي:هذي مريم؟؟..وش عندها صايره مؤدبه وتدق الباب خبري فيها انها تقط اذنها... شذى وهي تضحك:انتي يالهبله هذي امي اكيد....الدنيا بتتعدل ومريم عمرها ما تعدلت... وقامت شذى وفتحت الباب.... شذى بصراخ: مــــــــــــــــــهـــــــــــــا....هلا والله متى جيتي...والله انك جيتي بوقتك...انا موووت محتاجتك... مها وهي تسلم على شذى: لي اكثر من ساعه تحت...بالبدايه بغيت اطلع لك بس قلت خليها تتعدل على راحتها... وقامت ريم تسلم على مها: هلا مها شلونك؟؟؟... مها: تمام وانتي... ريم: بخير بس شكل شذى مطنشتنا.... مها: ليـه؟؟؟.. ريم: من لقى احبابه نسي اصحابه...انا لي معها اكثر من ثلاث ساعات واول ما شافتك نست قعدتي معها طول اليوم... شذى وهي تضحك:ما عليك منها يامها انتي بس قولي لي وش رايك بشكلي كذا......حلو؟؟؟؟؟. مها وهي تتأملها: إيه كذا حلو ...بس ما ادري احس ناقصك شي؟؟؟.... شذى بثقه: ابتسامتي.... ريم : اوووووووووووووووه يالثقه... شذى وهي حاطه يدها على خصرها: اكيــــــــــــــــد واثقه اذا شذى ماهي واثقه بنفسها...أجل مين اللي يثق؟؟؟ مها:اقول خلصيني...استعدي ترى محمد يقول جهزوا...عشان تدخل... وقتها تحولت ثقة شذى إلى خوف: تتكلمين من جد يا مها بلا مزح؟؟؟..... ريم وهي تضحك: اقول يا الواثقه...وين الثقه اللي قبل شوي شكلها تبخرت من سمعت طاري انه يشوفك... شذى: ريــــــم...تكفين خليني إلى ما ادخل وارجع اسوي فيك يوم ما تنسينه... ريم شافت توتر شذى فقالت: شذى حبيبتي لا تتعبين عمرك لأنك بتدخلين من هنا وانا بروح لبيتنا من هنا.... شذى تبي تقهر ريم: احسن شي بتسوينه من يوم عرفتك... ريم:اوكيه يا حلوة حطي يدك ورجولك بماي بارد...لأني بقعد عندك إلى ما يروح تركي الرياض زين؟؟؟ وهنا دخل ام محمد على شذى وريم ومها ومعها ريم الصغيره بنت محمد... ام محمد:اقول حبيبتي شذى خلصتي محمد اخوك تحت ينتظرك عشان تدخلين تشوفين تركي... شذى برعب: لا يمه باقي ما خلصت انتظري شوي... وقتها تشيل ريم صديقة شذى ريم بنت محمد:احلى ما فيه هالبنت اسمها ...تهبل يا شذى طالعه علي... شذى: طالعه عليك إلا على اخوي محمد يا الذكيه... ريم تبي تلطف الجو: لأنها ماخذه نفس اسمي عرفت ليش؟؟؟ ابتسمت لها شذى ابتسامه سريعه وقالت لأمها: يمه ما ابي اشوفه خلاص هونت... ام محمد باستغراب: إيش هونت؟؟؟.... شذى برعب:إيه هونت خليه يرسل صورته وانا بشوفها...كذا احسن... ريم: هين انتي توافقين عليه...بس المشكله هو رح ينصدم يوم العرس لمن يشوفك... شذى بضيق: كلي تبن زين... ام محمد: شذى بلا دلع البنات ذا وقومي معي...ولا ترا انادي لك ابوك ياخذك... مها: شوي شوي عليها ياخاله...كل البنات كذا...((وتلف على شذى)) شذى ليه ما تبين تدخلين؟؟؟.... شذى: مها تدرين إني ميته رعب وانا ما دخلت...فما بالك لو دخلت اتوقع يغمى علي من الخوف... مها وهي ماسكه يدين شذى وتبي تطمنها: كل البنات كذا وبعد الزواج تتذكرين نفسك وصدقيني بتضحكين عليها... شذى: ولو احس انا غير...... ما أدري لأني لا اعرفه ولا هم يحزنون... هنا رق قلب ام محمد على وحيدتها فلمتها بحظنها وقالت: سمي بالرحمن ياشذى وتوكلي على الله واخوك محمد بيكون معك شذى:ما ادري شأقول يمه .... ام محمد: زين يالله نزلي معي..... شذى بتوتر: زين يمه بس اعدل نفسي و انزل معك... ام محمد: وطول الوقت اللي فات وش تسوين؟؟؟.... شذى: اجهز نفسي.... وراحت شذى لعند التسريحة وتعدل نفسها.... ريم: لا تحاولين يا شذى خايسه خايسه........ شذى: بعينك خايسه........ مها: لا تخافين تمزح والله تهبلين....... وشذى وهي طالعه مع امها: اعرف ريم ومزحها.... وهنا تشد ريم شذى من يدها وتقول لها بصوت واطي: اقول شذى هالله هالله بالقز قزيه من راسه للرجوله زين؟؟؟.... شذى تفكها وتقول:زين إذا قدرت اشوف...تبيني اقز.... ونزلت شذى مع امها..... ريم: تتوقعين يا مها ان تركي حلو؟؟؟........ مها: ما ادري...... ريم: زين ما سألت خالد زوجك؟؟؟........ مها باستغراب: اساله عن إيش؟؟؟؟.... ريم بضيق:إذا تركي حلو او لأ..... مها بابتسامه: تتكلمين من صدقك انتي،عشان خالد يذبحني... ريم:ليـــــــــه؟؟؟... مها:لأنه زوجي وبيغار علي منه.... ريم بمزح: اموت بالغيره انا.... مها:إيه خليك كذا بنت مؤدبه... وضحكت ريم من كلام مها... وقعدت ريم ومها فوق بغرفة شذى يسولفون.... .................................................. ....................... بالمجلس عند الرجال كان جالس تركي وابوه ابو بندر وابو محمد وعياله كلهم محمد وخالد و سعود ... ابو بندر: وإذا ما عندكم مانع يابو محمد نبي تركي يشوف بنتكم ؟؟.... ابومحمد:ابد ما عندنا مانع...وهذا من حقه إنه يشوفها لو يبي ألحين...... ابو بندر:تسلم يابو محمد... ابو محمد: ابد يابوبندر ما جبنا شي من عندنا هذا من الدين والسنه.... ابو بندر: اصيل وتعرف الأصول يابومحمد...وماعليك امر لو يشوفها ألحيـــن.... ابو محمد:مايامر عليك عدو....وشوف يا سعود لتركي طريق عشان يشوف اختك... سعود:تامر يباه...((ويلف على تركي ))وحياك ياتركي معي... تركي بابتسامه:الله يحييك.... ويقوم سعود من المجلس ومعه تركي للمجلس ثاني بجنب مجلس الرجال عشان تركي يشوف شذى وتشوفه..... .................................................. ...................... بالمجلس الثاني.... سعود لتركي: حياك يا تركي البيت بيتك... تركي: الله يسلمك... ويروح تركي يجلس بالمجلس ويدخل سعود ينادي أخته.... تركي بخاطره((يارب اكتب لي الخير ووفقني باختياري))... ويقعد تركي يحاول يرسم صورة تقريبيه عن شذى من خلال وصف خالته عبير لها....... .................................................. ................................ سعود: اقول شذى يله قدامي بسرعه..... شذى بخوف وهي متمسكه بأمها: يماه خايفه تعالي معي... سعود يقلدها:يماه خايفه تعالي معي....اقول انتي هي بلا دلع يلا امشي قدامي انا اللي بدخل معك... شذى متفاجأه: انت؟؟؟؟.........ليه وين محمد وخالد؟؟؟.... سعود يخزها: مع ابوي بمجلس...ليه انا مهوب عاجبك يا آنسه شذى؟؟؟....... شذى: بصراحه انا كان ودي محمد او خالد....كبار ويعرفون بهالسوالف مهوب انت بزر باقي.... ام محمد: لا سعود فيه الخير والبركه.... سعود يعصب من كلام اخته ويقرب منها ويمسكها مع شعرها ويجرها على فوق إلى ما وقفت على اطراف اصابيع رجلها... سعود بمكر:تبيني أدخلك يا شذى على تركي كذا???????... ام محمد: سعود فك اختك.... شذى:آآآي....سعود حرام عليك فكني احس خلاص شعري بيتقطع في يدك...آآآي حشى هذي مو يد انسان... ام محمد تفك شذى من سعود: سعود بس اترك اختك هذا بدال ما تطمنها... سعود: امزح يمه معها وش فيك.... شذى وهي تعدل شعرها ونفسها: ألحين انت تمزح انت ووجهك؟؟؟...هذا وقت مزح... سعود بابتسامه:وش رايك بمزحي حلو خفيف صح؟؟؟.... شذى بطنازة: إيــــه مزحك مووووت خفيف... سعود:أوووووه نسيت الرجال بالمجلس...يلله شذى امشي معي... شذى: يلله هذا انا معك... ام محمد:الله يكتب لك الخير كله ياشذى... سعود:الله عليك يماه تبين الخير كله لشذى وتنسين عيالك ... ام محمد: كلكم يا سعود ولا تزعل... سعود: اقول شذى يله ابطينا على الرجال بالمجلس... وتمشي شذى مع اخوها والخوف متملك قلبها................................. .................................................. .................................... ......:شذى حبيبتي تراه انسان مثلنا ما ياكل آوادم ...وش اللي يخوفك منه؟؟؟...... شذى وهي واقفه عند الباب:...انت ماتفهم خايفه... سعود: اقول والله لو ما تمشين لأجرك بشعرك مثل قبل شوي احذفك عنده داخل... شذى بنظرات حقد:............. سعود بضيق:لنا ساعه عند الباب ليه ما تدخليــن؟؟.. شذى بعد ماجمعت باقي قوتها: يلله ادخل توكلنا على الله... سعود:إيه خليك كذا.... ودخل سعود ومعه شذى اللي تمشي بخوف وارتباك.... سعود: حياك يا بنت فيصل... ولما شاف تركي سعود وهو داخل وكان وراه طيف امرأه ما لمحها زين وقف... سعود: ارتاح يا تركي...هذي اختي شذى... وقعد تركي وسعود...وراحت شذى وقعدت بجنب اخوها سعود وهي عيونها بالأرض ماهي قادرة تشيلهم... تركي:شخبارك يا شذى؟؟؟... شذى بارتباك: بخـير.... وقعد تركي يقز بشذى ويناظرها... تركي وهو ما شال عينه من شذى:شخبار الدراسه معك يا شذى؟؟؟... شذى: بخيـر... تركي يسألها:انشالله ناجحه هالسنه؟؟؟... سعود يتدخل: من هالناحيه لا تخاف بالدراسه مصريه شذى... تركي بابتسامه عريضه: صدق يا شذى اللي يقوله أخوك سعود؟؟؟.... شذى بخاطرها((هين يا سعود تقوله إني انا مصريه وتفشلني خل الناس تروح ويصير خير))وكل هذا وهي ما رفعت عيونها... تركي: هاه شذى انتي بالدراسه مصريه ولا إيش يقصد سعود؟؟؟... شذى بخجل: يبالغ سعود.....مهوب للدرجة المصريين عاد... وقعد تركي وسعود يضحكون عليها.... و قعدت شذى تفكر((مشالله على الأخ تركي طايح فيني قز من أول مادخلت وانا ما لمحت شي منه غير ثوبه ياربي ابي اشوفه)) وقعدت تقول بخاطرها((لازم ارفع عيني واشوفه هالرجال باعيش معه طول عمري يارب عطني الشجاعه إني اقدر اشوفه واطالعه بس)) تركي حب يحرك الجو شوي وقال:وإذا شذى موافقه علي أباخذها الليله معي الرياض مره وحده وبلاعرس بلازحمه؟؟؟... من صدمة شذى بهالكلام رفعت عينها وقعدت تطالع فيه من الصدمه...وش هالكلام؟؟؟ حلوة ياخذني بلوشي كذا؟؟؟.... سعود يبي يقهر شذى: وإذا علينا إحنا اهلها ماعندنا مانع....الله يستر عليها... هنا كل تفكير شذى وقف وقعدت تطالعه وما قدرت تنزل عينها من اللي شافته... كان حلو ووسيم....كان أحلى مما توقعت بكثير...للدرجه حست إنه هو أحلى منها بواااجد ...وفيه جاذبيه لها مهوب طبيعيه... تركي بمكر:هاه شذى...وش قلت،سرينا الليله على الرياض؟؟؟... شذى لا إيراديا: طبعا لأ......وبعدها استحت ونزلت عيونها.... هنا قعد يضحك سعود ومعه تركي على ردت فعلها... تركي وهو يناظر شذى: لا تخافين امزح معك ومارح تمشين انشالله معي من الشرقيه للرياض إلا بعرس اهل السعوديه كلها تتكلم عنه. حست شذى من كلامه إنه موافق عليها وراضي عنها....ويبيها... .................................................. ........................... |
||||
|
|
|
06-23-07, 09:17 PM
|
#4 | ||||
|
رد: ...((يا عيونه بس يكفيني عذاب))...
انتظروووووو مني التكملها
تحيااااااااااااااتي مذهلة انتظر الردود |
||||
|
|
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| غابت عني ولا ادري وش حالتــها00ولا ادري وشلون قلبي بتنام عيونه | $الدموع الساكبه$ | (✿) تَرَاتِيْل الْرُّوْح | 2 | 05-31-09 12:32 PM |
| الموت و موجبات و منجيات عذاب القبر ويوم القيامة و الحساب و الصراط و المزيد المزيد | الامبراطور | (✿) شذا الكلمات | 4 | 03-02-08 02:40 AM |
| عذاب القبر ونعيمه | نجود | (✿) نَفَحَات رَوُحَانِيّه | 8 | 01-12-08 08:18 AM |
| قصة ابكت 1000 بنت خليجيه .:: مــمـيـز .::. | ملاك و حبه هلاك | (✿) يُحْكَى أَن .. | 32 | 05-17-07 06:03 PM |
| صور من عذاب القبر | جربوع لابس قبوع؟؟؟ | (✿) نَفَحَات رَوُحَانِيّه | 14 | 09-09-05 09:21 PM |
| لمني بشوق | منتديات لمني بشوق | مركز تحميل لمني بشوق |
العرض العادي
