يوم اختفيت شوفو وش سويت !!!!!!!!!

يوم اختفيت شوفو وش سويت !!!!!!!!!

SalaM

لا يقولي احد وشلون وما وشلون تصير غير مرئي ! انتم كملوا هالموضوع وتدرون وشلون صرت غير مرئي .. طبعاً قمت هذاك اليوم من النوم ولإني ولد كيوت فمن الطبيعي اول شي اسويه اشوف شكلي بالمرايه عشان اعرف الناقص من اعضائي الي ممكن اكون ضيعتها في حلومي .. خبركم أحلامي دايما مليئه بالحركه و الدراما , لكن ياولد يوم قربت للمرايه ومافيه احد !! يمين شمال افرك عيوني مافيه بالمرايه احد انادي و انادي وتصطرني المرايه تقولي وش دخل الصوت بالصوره يا ثور ؟ وبعدين خلاص انت انسان غير مرئي مايشوفك احد انقلع قلت لها اما عاااااااد يعني الحين اقدر اسوي الي ابي ولا احد يشوفني ؟؟ قالت لي ايه الحين لك الخيار تبي تصير غير مرئي ولا تبقى مثل ما انت عاهه متحركه ؟ قلت بدون تفكير حتى خليني زي ما أنا محد يشوفني

وأجيكم مستانس على هالاختفاء والي اكثركم حاسدني عليه .. واروح افصخ ملابسي عند باب الشارع و اطلع اركب موتري (( أبفصخ بكيفي محد يشوفني !! )) وادق سلف واقول مابدهااااش تفكير بروح ادخل الفيصليه و ابن أمه السيكروتي يقولي عوايل , لكن ما امداني اطلع مع الشارع العام الا وانا وموتري في اول نخلة بالطريق ! واسمي بالله واشوف الا والله دوريه الي دافني ومدخلني بالنخله ومعه ثلاث دوريات محوطين على سيارتي وواقفين يتحككون بدون مايدرون وش السالفه ! وافتح الباب وانزل وينحاشون كلهم الا واحد ماشالته رجلينه وجلس يصيح عند الدوريه ويتعوذ من ابليس ويقول تكفى لا تدخل فيني تكفى قلت وش تكفاه و ادخله ؟ والله لو انك الفيصليه ولا المملكه عشان ادخلك ! قالي تفووه اعوذ بالله منك وش تبي ؟ قلت ياخوي وش الي وش ابي .. مدخلني بالنخله وتقولي وش ابي ؟ ووقتها تذكرت اني غير مرئي وان هالعسكري مايشوفني .. واقوم امسكه على جمب واحاول اقنعه ساعتين اني انسان صدقي بس مختفي ولا يشوفني احد .. وبالاخير عطاني مخالفة عدم وجود ملامح و إتلاف أموال الدوله المتمثله بالنخلة ! وقالي لا تعودها لان النظام مايسمح الا للاوادم يسوقون ! وكأني مش آدمي يعني ؟؟؟

وتقفل معي الاخلاق وأهون عن روحة الفيصليه لاني بصراحه ما احب يشوفني احد وموودي مو كيوت <<-- أبذلكم بكلمة كيوت تشوفون .. المهم واقرر اني اروح للفوال القريب وافطر وفعلاً دخلت عند الزعيم ابو نعمان واجلس بأقرب جلسه واقوله قلابه مشكل مع سفن يا زول .. ويرد ابونعمان وهو يناظر خويه بنظرات توحي بشر و يقوله داير إمتى حتبطل حركات الاستهبال دي و الحكي من بطنك ؟ وتخنقني العبره بعد ماحسيت اني هامشي واقوم بنفسي عشان اطلب من عنده .. لكن للأسف تكررت معاناتي وكل مامسكت سرا جا واحد وخطم علي وعلى هالحال لين أذن الظهر وطلعت قبل مايقفل ابونعمان الباب لانه لو قفله ماعاد يفرق بين مرئي ولا غير مرئي الي في راسه بيطيحه هههههههههههه

واستمريت على حالي طوال اليوم ! أدخل البقاله و اعطي الهندي الحساب كل مره ويجلس يضحك ويقول الهمدولله فلووس بلاش من ربي ويحطها بالدرج .. اخش ابي اغسل يديني في دورات المياه يرجفني واحد ويغسل مكاني .. حتى بيتنا رجعت ولقيت غرفتي محولينها أهلي لغرفة جلوس ..حتى بالصلاة مالقيت مكان أصلي فيه مع الجماعه ! .. و ارجع للمرايه و اقولها يا مرآتي العزيزه من اجمل امرأه ؟ لا اصبرو مو هذي سالفتنا هههههههههه .. رحت للمرايه وقلت لها خلاص مليت من هالميزه الي حولتني هامشي رجعيني انسان طبيعي ارجووووووك ولك الي تبين

وردت علي قالت حس بالتهميش الي يحسونه أخوانك المعاقين يا شنب الارنب .. وانكسرت منتحره وتركتني غير مرئي و على المجتمع انه يتقبلني زي ما انا .. غير مرئي

فـللأسـف بطل هالقصه الي قريتوها ماهو انا ولا اي شخص غير مرئي .. إنما شخص من ذوي الاحتياجات الخاصـة والي همشه المجتمع وحوله إلى إنسان غير مرئي لا يعتد بوجوده للأسف ! مواقفهم الخاصه في كل مكان تغتصب .. لا احترام لهم وتقدير لأوضاعهم في الاماكن العامه وكثيراً ما ينسحبون بخجل لصعوبة تأقلمهم مع المكان , فلا وسائل تساعدهم في أغلب المنشآت الأهلية و الحكومية بالإضافـة لنظرات الشعب الدونيه لهم !! لا أنا ولا أنتم ولا أكبر الوزراء يضمن عدم تعرضه لحادث يحوله لأحد ذوي الإحتياجات الخاصة .. كل ما يطلوبنه هؤلاء الأخوه هو معاملتهم كأناس طبيعيين فقـط ؛

ما يستفاد من الموضوع

أن النخل غالي
أن ابونعان لازم تزوجونه بأقرب وقت وتفكون العالم من شره
أن العالم وصلو كوكب المشتري وحنا تونا يقولون ممنوع الدخول للعوايل فقط

وأخيراً .. إن الإعاقـة الفعليه فـي التفكـيـر لا الجـسـد

شكـراً كثر ما أبثرتكم

م ن ق و ل

المصدر: منتديات لمني بشوق - من قسم: (✿) الضَحَك والفرفشَة

[درة الخليج...]

يسلمووووووووووووووووو

درة الخليج

يعطيك العافيه وشاكر لك على المرور

[الريم...]

مشكووووووور شنب على النقل .................

تصدق انا كاني قاريه نفس الاسلووب في الكتابه لشخص من منتدى ثاني .......................اعتقد هو نفسه ....

وكان بعد يتشكا من سالفه العوايل خخخخ ............


تحياتي

الــــريــــم

[~][ جــــوووري ][~...]

شنب الارنب
والله قصه هادفه
ولو ان كاتبها جابها اسلوب مزح وضحكـ

يعطيكـ العافيهـ ياربي
اتمنى الجميع يستفيد من مضمون القصهـ
[لايمكن مشاهده الصور والروابط الا بعد التسجيل ]
ننتظر المزيد
لاتحرمنا جديدكـ

الريم
مشكوره على مرورك الرائع

بعدين اكيد انه مو اول ولا اخر واحد يتشكا من سالفة العوائل

كل شباب الرياض بصفه عامه يتشكون من العوائل

كل مكان عوائل عوائل

إحنا يا لعزاب وين نروح ؟؟؟؟؟؟؟؟

غير المقاهي ودوران في شوارع التحليه وغيره

الجوري
يعطيك العافيه
على مرورك الرائع
والي انا بصفه خاصه
فاقده من زمان

نورتي متصفحي
[لايمكن مشاهده الصور والروابط الا بعد التسجيل ]

[العسلي...]

مشكور اخوي شنب الارنب على النقل الرائع
والله يساعدنا وياهم اخواننا ذوي الاحتياجات الخاصه والصراحه فيهم الخير والبركه يكفي انهم جابوا كأس العالم والصاحين هم المرضانين حدهم كأس الخليج لا هذا واذا كان يمدهم بعد
وعلى النخل والله انه من جد غالي
وابو نعمان وشلون لو اننا نلقاله سوريه ونزوجه والله ان ينهبل ويخلي الاسبوع كله بلاش
مشكور اخوي شنب الارنب

اخوك العسلي

[~][ جــــوووري ][~...]

السموحهـ والله
يا خوي

لاني انا ياللهـ أقدر ألحّق امر ع المواضيع في كل قسمـ
فالسموحه منكـ

والمتواجدين من الاعضاء ماشاء الله فيهمـ الخير والبركه

ومع ذلكـ اوعدك
ان شاء الله تشوف تواجدي في مواضيعكـ
[لايمكن مشاهده الصور والروابط الا بعد التسجيل ]

[ღلقـ روحـي ـيتღ...]

موضوع رائع وهادف برضو ..

تسلم شنب الارنب ..

::

عوافي على قلبك ..

احترامي لشخصكم الكريم ..

اخوي العسلي

اهني فيك معلوماتك الرياضيه

ومن ناحيت ابو نعمان مزوجينه مزوجينه الله لا يعوق بشر

وشاكر لك على مرورك الرائع يعطيك العافيه

معذوره اختي الجوري

والله يلوم الي يلومك

نورتي متصفحي

ويعطيك الف عافيه
وعساك على القوه

لقيت روحي

اشكرك على مرورك الرائع

نورتي متصفحي

وعوافي على قلبك